මෙම රිය අනතුරේ දී පුද්ගලයෙකුට තුවාල සිදුකිරීම, රියදුරු මාරු කිරීම සහ කුමන්ත්‍රණ යන චෝදනා යටතේ පාඨලි චම්පික රණවක මහතාව අත්අඩංගුවට ගැනීමට නීතිපති විසින් කොළඹ ප්‍රදේශය බාර ජ්‍යෙෂ්ඨ නියෝජ්‍ය පොලිස්පතිවරයාට අද පස්වරුවේ උපදෙස් දෙනු ලැබිණ. ඒ අනුව පාඨලි චම්පික රණවක මහතා අත්අඩංගුවට ගැනීම සිදුකර ඇති බව, නීතිපති සම්බන්ධීකරණ නිලධාරිණී රජයේ අධිනීතිඥ නිෂාරා ජයරත්න මෙනෙවිය රූපවාහිනියට පැවසීය.
මෙම සිද්ධිය සම්බන්ධයෙන් පාඨලී චම්පික රණවක මහතාට සහ ඔහුගේ රියදුරු දිලුම් තුසිත කුමාරට විදේශ ගමන් තහනමක් පසුගිය සඳුදා (16) කොළඹ අතිරේක මහේස්ත්‍රාත් විසින් පනවනු ලැබිණ.
අත්අඩංගුවට ගැනීම සිදුකර ඇත්තේ, ඒ මහතාගේ බත්තරමුල්ල, ජයන්තිපුර ප්‍රදේශයේ පිහිටි නිවසේදී. කොළඹ අපරාධ පරීක්‍ෂණ කොට්ඨාසයට ඔහු රැගෙන ආ බව, එහි සිටින අප වාර්තාකරු පවසයි.
අදාළ රිය අනතුරෙන් හෝමාගම, ගොඩගම ප්‍රදේශයේ පදිංචි සන්දීප සම්පත් නමැති තරුණයෙකු බරපතල තුවාල ලැබීය.
