ජනාධිපතිවරයා 2020 මාර්තු 16 තෙක් ජනාධිපති ධූරය දැරුවහොත් වර්තමාන ආණ්ඩුව විසුරුවාලීමට ජනාධිපතිට බලය තිබෙන බවත් ඒ අනුව ජනාධිපතිවරණයකට පෙර මහාමැතිවරණයක් පැවැත්විය හැකි බවත් ජයසේකර මහතා පැවසීය. හෙතෙම මේ බව පැවසුවේ ශ්‍රී ලංකා නිදහස් පක්ෂ මුලස්ථානයේ ඊයේ (9) පැවැති මාධ්‍ය සාකච්ඡාවකට එක් වෙමින්.

එහිදී වැඩිදුරටත් ඒ සම්බන්ධයෙන් අදහස් දැක්වූ මහ ලේකම්වරයා මෙසේ ද පැවසීය.

ජනාධිපතිතුමාගේ ධූර කාලය අවුරුදු පහ ද හය ද කියන කාරණය ගැන ශ්‍රේෂ්ඨාධිකරණයෙන් මීට පෙර විමසීමක් කළා. ඒ අනුව එය අවුරුදු 5 යි කියලා තීන්දුව දිලා විසඳිලා තිබෙනවා. අවුරුදු 5 පටන් ගන්නේ සහ ඉවර වෙන්නේ කවදා ද කියන එක ගැන තමයි දැන් ප්‍රශ්නේ තිබෙන්නේ.

අපේ ආණ්ඩුක්‍රම ව්‍යවස්ථාවේ පැහැදිලිව තිබෙනවා කතානායකවරයා යම් පනතක් අනුමත කළ පසුව තමයි එය පනතක් බවට පත් වන්නේ කියලා. ඒ අනුව 19 වැනි ආණ්ඩුක්‍රම සංශෝධනය ගතහොත් ඊට කතානායකතුමා අත්සන් කර තිබෙන්නේ 2015 ජුනි මාසේ 22 වැනිදායි.

අපිට අතීතයට බලපාන පරිදි පනත් සම්මත කළ නොහැකියි. ඒ නිසා පනතක් සම්මත වු පසුව ඒ සම්මත කළ දිනයේ සිට ඉදිරියට තමයි එය ක්‍රියාත්මක වන්නේ. ඒ නිසා 2015 ජුලි 21 ඉදලා අවුරුදු පහක් ගැන්න විට 2020 ජුනි මාසේ නැවත ජනාධිපතිවරණයක් තිබිය යුතු කාලය කියලා තමයි අපේ අදහස තිබෙන්නේ.

ඒ ගැන මතය විමසන්න අපිට ශ්‍රේෂ්ඨාධිකරණයට යන්න පුළුවන්. ජනාධිපතිතුමාට වුවත් පුළුවන්. සමාජයේ මේ ගැන විශාල සාකච්ඡාවක් තිබෙනවා. අපේ පක්ෂයේත් තිබෙනවා. එය අර්ථ නිරූපනය කළ හැකි වන්නේ ශ්‍රේෂ්ඨාධිකරණයට බැවින් ඒ සම්බන්ධයෙන් ශ්‍රේෂ්ඨාධිකරණයට යන්න පක්ෂය තුළ සාකච්ඡා තිබෙනවා.

මේ අනුව ක්‍රියාත්මක වුණොත් ජනාධිපතිතුමාට ලබන 2020 මාර්තු 16 මාසයෙන් පසුව පාර්ලිමේන්තුව විසුරවන්නට බලයක් එනවා. ඒ කාලය වන විට ජනාධිපති ධූරයේ මෛත්‍රීපාල සිරිසේන මහතා සිටියොත් ජනාධිපතිවරණ කතා නැහැ. මහමැතිවරණයක් තමයි පවත්වන්න වෙන්නේ. ඒ නිසා කාලය මේ ප්‍රශ්න විසඳා දෙයි. ජනාධිපතිතුමා පරිණත නායකයෙක් නිසා තමයි අපේක්ෂකයෙක් ගැන කතා නොකර නිහඬව ඉන්නේ යැයි හේ කීවේය.