හිටපු ආරක්ෂක ලේකම් ගෝඨාභය රාජපක්ෂ මහතා ඇතුළු විත්තිකරුවන් හත් දෙනෙකුට එරෙහිව ගොනුකර තිබෙන මෙම නඩුව විභාග කිරීමට අධිකරණයට බලයක් නොමැති බව සඳහන් කරමින් විත්තිය විසින් පසුගියදා මූලික විරෝධතා ඉදිරිපත් කර තිබිණ.
එම මූලික විරෝධතා ප්‍රතික්ෂේප කිරීමට එරෙහිව ගෝඨාභය රාජපක්ෂ මහතා ඇතුළු විත්තිකරුවන් හතර දෙනෙකු විසින් ශ්‍රේෂ්ඨාධිකරණය වෙත යොමු කිරීම සඳහා අභියාචනා ඉදිරිපත් කර ඇත. එහෙත් එම අභියාචනා භාර ගැනීම ප්‍රතික්ෂේප කරන බව කොළඹ ත්‍රිපුද්ගල විශේෂ මහාධිකරණයේ සභාපති විනිසුරු සම්පත් අබේකෝන් මහතා දැනුම් දී තිබේ.
මෙම නඩුව සම්පත් අබේකෝන් (සභාපති), සම්පත් විජේරත්න සහ චම්පා ජානකී රාජරත්න යන ත්‍රිපුද්ගල මහාධිකරණ විනිසුරු මඩුල්ල හමුවේ අද කැඳවනු ලැබිණි.
ඉන් අනතුරුව නඩුවේ 6 වන විත්තිකරු ලෙස නම් කර සිටින මහින්ද සාලිය නමැත්තා නඩුව කැඳවූ අවස්ථාවේදී අධිකරණය පෙනී සිටියේ නැත. ඒ පිළිබඳ විමසූ අවස්ථාවේ ඔහුගේ නීතිඥවරයා අධිකරණයට දන්වා සිටියේ තම සේවාදායකයා නඩු විභාගයට සහභාගි වීම සඳහා අද දින අධිකරණයට පැමිණි බවත් ශල්‍යකර්මයකට භාජනය වී සිටින ඔහුට හදිසියේ ලේ වහනය වීම නිසා අධිකරණයෙන් පිටව ගොස් මේ වන විට රෝහල් ගතව සිටින බවයි.
අනතුරුව නඩු විභාගය මාර්තු මස 01 වනදා දක්වා කල් දැමූ ත්‍රිපුද්ගල විශේෂ මහාධිකරණය එදිනට එම විත්තිකරු සම්බන්ධයෙන් වෛද්‍ය වාර්තාවක් අධිකරණයට ඉදිරිපත් කරන මෙන් ද ඔහුගේ නීතිඥ වරයාට නියම කර තිබේ.
ඉකුත් රජය සමයේ මැදමූලන ප්‍රදේශයේ දී ඩී. ඒ. රාජපක්ෂ අනුස්මරණ කෞතුකාගාරය ඉදිකිරීම සඳහා ඉඩම් ගොඩ කිරිමේ හා සංවර්ධනය කිරීමේ සංස්ථාවට අයත් රුපියල් මිලියන 33.9 ක මුදලක් සාවද්‍ය පරිහරණය කළ බවට චෝදනා කරමින් ගෝඨාභය රාජපක්ෂ මහතා ඇතුළු විත්තිකරුවන්ට එරෙහිව පොදු දේපල පනත යටතේ නීතිපතිවරයා මෙම නඩුව පවරා තිබේ.
මෙම නඩුවේ සෙසු විත්තිකරුවන් ලෙස ඉඩම් ගොඩකිරීමේ හා සංවර්ධනය කිරීමේ සංස්ථාවේ හිටපු සභාපති ප්‍රසාද් හර්ෂණ ද සිල්වා සහ එම ආයතනයේ අධ්‍යක්ෂ මණ්ඩලයේ සාමාජිකයින් වශයෙන් කටයුතු කළ භද්‍රාවතී කමලදාස, සුධම්මික ආටිගල, සමන් කුමාර ගලප්පත්ති , ඩී මෙන්ඩිස් සාලිය සහ මල්ලිකා කුමාරි සේනාධිර යන අය නම් කර තිබේ.
