දඹුල්ල කුරුණෑගල ප්‍රධාන මාර්ගයේ ගලේවෙල කළු පමල් පාලම ප්‍රදේශයේදී ඊයේ (06) පස්වරුවේ ත්‍රිරෝද රථයක් මාර්ගයෙන් ඉවතට පැන පාලම මතින් ඇළට පෙරළී යාම හේතුවෙන් මෙසේ අඹුසැමි යුවළ බරපතල තුවාල ලබා තිබේ.
මෙම අඹුසැමි යුවළ ගලේවෙල කුඩාවැව ප්‍රදේශයේ පදිංචිකරුවන් වන බවත් ඔවුන් පෞද්ගලික කටයුත්තක් සඳහා දඹුල්ල නගරයට ගොස් නැවත ගලේවෙල දෙසට ධාවනය කරද්දී තවත් වාහනයක් ඉස්සර කිරීමට ගොස් වේගය පාලනය කර ගැනීමට නොහැකිව මාර්ගයෙන් ඉවතට පැන මෙම අනතුර සිදුවන්නට ඇතැයි පොලිසිය සැක කරයි.
මීට දින කිහිපයකට ඉහත දී සිමෙන්ති පැටවූ ලොරි රතයක් මෙම පාලමේ බැම්ම ඇළට පෙරළී යාම හේතුවෙන් මෙහි පාලමේ ආරක්ෂිත බැම්ම කැඩී ගොස් තිබිණි. මාර්ග සංවර්ධන අධිකාරිය මගින් තාවකාලිකව නැවත වරක් මෙම ආරක්ෂිත පැති බැම්ම ඉදිකරන තුරු ඉදිරිය පෙනෙන ආකාරයෙන් අනතුර පෙන්වා දී තිබිණි.
අනතුරට පත් ත්‍රීරෝද රථයට දැඩි ලෙස අලාභහානි සිදුවී ඇති අතර තුවාල ලැබූ අඹුසැමි යුවළගේ තත්ත්වය බරපතළ බව රෝහල් ආරංචි මාර්ග සඳහන් කර සිටී. අනතුර සම්බන්ධයෙන් ගලේවෙල පොලිසිය වැඩිදුර පරීක්ෂණ පවත්වයි.
