චම්පා ජානකී රාජරත්න, දමිත් තොටවත්ත සහ නාමල් බලන්නේ යන මහත්ම මහත්මීන්ගෙන් සමන්විත ත්‍රිපුද්ගල මහාධිකරණ විනිසුරු මඩුල්ල විසින් මෙම නියෝගය නිකුත් කළේය.
මෙම නඩුව අද කැඳවූ අවස්ථාවේදී ශ්‍රී ලංකා ඉඩම් ගොඩකිරිමේ සංස්ථාව වෙනුවෙන් පෙනී සිටි නීතිඥ කපිල ලියනගම මහතා අධිකරණය හමුවේ කරුණු දක්වමින් මෙම ව්‍යාපෘතිය සඳහා අයවිය යුතු රුපියල් 33944741.60 මුදල ඩී ඒ රාජපක්ෂ අනුස්මරණ පදනම විසින් 2017 වසර ජූලි මස 13 වැනිදා වන විට ගෙවා අවසන් කර ඇති බවට එම සංස්ථාව විසින් සිදුකළ අභ්‍යන්තර පරීක්ෂණයකදී අනාවරණය වී ඇතැයි පෙන්වා දුන්නේය.
මෙම නඩුවට පාදක වන මුදල ඩී. ඒ. රාජපක්ෂ අනුස්මරණ පදනම විසින් ගෙවා අවසන් කර ඇති බව එම සංස්ථාව විසින්ම නීතිපතිවරයා දැනුවත් කර ඇති හෙයින් මෙම නඩුවේ විත්තිකරුවන්ට එරෙහිව අපරාධ නඩු විධාන සංග්‍රහයේ 194(1) වගන්තිය යටතේ තවදුරටත් නඩුව පවත්වාගෙන යාමට අපේක්ෂා නොකරන බව නීතිපතිවරයා වෙනුවෙන් පෙනී සිටි නියෝජ්‍ය සොලිස්ටර් ජනරාල් දිලීප පිරිස් මහතා අධිකරණයට දැනුම් දුන්නා.
මෙහිදී විත්තිකරුවන් වෙනුවෙන් පෙනී සිටි ජනාධිපති නීතිඥ අනිල් සිල්වා මහතා ඇතුළු විත්තියේ නීතිඥවරු අධිකරණයෙන් ඉල්ලා සිටියේ ඒ අනුව මෙම විත්තිකරුවන් නිදහස් කරන ලෙසයි.
ඒ අනුව විත්තිකරුවන් නිදහස් කිරීමට නියෝග කළ ත්‍රිපුද්ගල මහාධිකරණය ඔවුන්ගේ විදේශ ගමන් තහනම් කිරීමේ නියෝගය ඉවත් කරන ලෙස ආගමන විගමන පාලකවරයාට නියෝග කළ අතර අධිකරණය භාරයේ පවතින ඔහුගේ විදේශ ගමන් බලපත්‍ර මුදාහරින ලෙස නියෝග කළේය.
මෙම නඩුවේ විත්තිකරුවකු ලෙස ගෝඨාභය රාජපක්ෂ මහතා ද නම් කර තිබූ අතර ඔහු ජනාධිපතිවරයා විසින් තේරී පත්වීමෙන් පසුව ඔහුට එරෙහි නඩු කටයුත්ත අවසන් කිරීමට අධිකරණය 2019 වසරේ නියම කර තිබිණ.
