සිසුන්ට ජීවිතවලින් වන්දි ගෙවන්නට සිදු වූ, වසර ගණනාවක් රෝගී තත්ත්වයට පත් කළ මේ අමානුෂික ක්‍රියාවලිය විශ්වවිද්‍යාල පද්ධතියෙන් ඉවත් කිරීමේදී පවතින ප්‍රධාන ගැටලුව ඇතැම් ආචාර්යවරුන් පවා එක්තරා මට්ටමකින් නවක වදය පැවතීම අනුමත කරන මානසිකත්වයක පසුවීම බවත්, කිසිදු ආකාරයකින් එය එසේ නොවිය යුතු බවට ප්‍රබල ජනමතයක් විශ්වවිද්‍යාල අභ්‍යන්තරය තුළ ගොඩ නැගීමෙන් පමනක් මේ තත්ත්වය වෙනස් කළ හැකි බවත් අධ්‍යාපන අමාත්‍යවරයා වැඩිදුරටත් පැහැදිලි කළේය.
විශ්වවිද්‍යාල අධ්‍යාපනය සිසු දරුවන්ට බියෙන් සැකෙන් තොරව අවසන් කිරීමට හා ඉගෙනීමට හැකි පරිසරයක් ගොඩනැගීමට අවශ්‍ය සියලු ක්‍රියාමාර්ග ගන්නා බවද අමාත්‍යවරයා තවදුරටත් පැහැදිලි කළේය.
අමාත්‍යවරයා මේ බැව පැවසුයේ පසුගිය දා නවකවදය සිද්ධියක් නිසා දැඩි ලෙස රෝගාතුර වූ ශ්‍රී ජයවර්ධනපුර විශ්වවිද්‍යාලයේ කළමනාකරණ පීඨයේ සිසුවකු වන පසිදු හිරුෂාන් පෙරේරා සිසුවාගේ ඉදිරි අධ්‍යාපනය වෙනුවෙන් ශීෂ්‍යත්වයක් පරිත්‍යාග කිරීමේ අවස්ථාව සඳහා කොළඹ විශ්වවිද්‍යාල ප්‍රතිපාදන කොමිෂන්සභාවේ දී සහභාගීවෙමිනි.
මෙම ශිෂ්‍යත්වය සඳහා හේමාස් සමාගමේ අභාස් ඉසුෆාලි මහතා විසින් අනුග්‍රාහක දායකත්වය සපයා ඇත.
“අප රටේ අධ්‍යාපනයේ තිබෙන ප්‍රධාන ම ගැටලුව අපි දැන් පැහැදිලිව හඳුනගෙන තිබෙනවා. ඒ තමයි දරුවන් ලබන අධ්‍යාපනය සහ රැකියා වෙළඳපොළ අතර තිබෙන නොගැලපීම.
පාඩම් මූලික අධ්‍යාපනය තුළින් විෂය කරුණු දැනගැනීම ඉතා හොඳින් සිදු වුවත් දරුවන් තුළ ඇතිවිය යුතු මෘදු කුශලතා සංවර්ධනයක් මේ අධ්‍යාපන ක්‍රමය තුළින් නොලැබී යාම. මේ සඳහා නව රජයේ වැඩපිළිවෙළ 2021 ජනවාරි මාසයේ සිට ක්‍රියාත්මක කිරීමට අප රජය බලාපොරොත්තු වෙනවා. මෙවර සමස්ත විශ්වවිද්‍යාල පද්ධතියට ම දරුවන් 10500ක් පමණ වැඩිපුර ඇතුළත් කර ගනු ලබනවා.
මේවගේ දරුවන් විශ්වවිද්‍යාලවලට දෙමාපියන් එවන්නේ දහසකුත් බලාපොරොත්තු ද සමඟිනුයි. එවැනි වටපිටාවක දරුවන් නවකවදයට ලක්වීම කණගාටුදායක යි. රටේ අනාගතය වෙනුවෙන් මා ඉල්ලා සිටින්නේ විශ්වවිද්‍යාල තුළ සිටින ඇතැම් දරුවන්ගෙන් සහ ඇතැම් විශ්වවිද්‍යාල සේවක සේවිකාවන් මෙන් ම ආචාර්යවරුන්ගෙනුත් මේ මානසිකත්වය ඉවත් කරගනිමු. එසේ නොමැති වුවහොත් මේවගේ අනතුරු රැසකට අපට මුහුණ දෙන්නට වේවි.” යනුවෙන් අමාත්‍යවරයා ප්‍රකාශ කළේය.
මෙම අවස්ථාට අධ්‍යාපන රාජ්‍ය අමාත්‍ය නිශාන්ත ද සිල්වා මැතිතුමන්, අමාත්‍යංශ ලේකම් මහාචාර්ය කපිල පෙරේරා, විශ්වවිද්‍යාල ප්‍රතිපාදන කොමිෂන්සභාවේ සභාපති මහාචාර්ය සම්පත් අමරතුංග, උප සභාපති මහාචාර්ය ජනිතා ලියනගේ, ශ්‍රී ජයවර්ධනපුර විශ්වවිද්‍යාලයේ උපකුලපති මහාචාර්ය සුදන්ත ලියනගේ, අධ්‍යාපන අමාත්‍යංශයේ මාධ්‍ය ලේකම් බුද්ධික වික්‍රමාදර, පසිඳු හිරුෂාන් දරුවා සහ දෙමාපියන් ඇතුළු පිරිසක් ද සහභාගී වූහ.
