මෙම චෝදනා සම්බන්ධයෙන් 2010 වසරේ අගෝස්තු 06 වැනිදා පොලිස් අත්අඩංගුවට පත් සක්විති හවුසිං ඇන්ඩ් කන්ස්ට්‍රක්ෂන් සමාගමේ අධිපති චන්දන විරකුමාර හෙවත් සක්විති රණසිංහව මෙතෙක් රක්ෂිත බන්ධනාගාර ගත කර තිබුණ.

2006 නොවැම්බර් 01 වනදා සහ 2008 සැප්තැම්බර් 31 වැනිදා අතර කාලසීමාව සක්විති හවුසිං ඇන්ඩ් කන්ස්ට්‍රක්ෂන් නමින් මූල්‍ය සමාගමක් පවත්වාගෙන ගොස් එහි තැන්පත් කර තිබු මහජන මුදල් රුපියල් කෝටි 162 කට අධික මුදලක් සාවද්‍ය පරිහරණය කිරීම ඇතුළු චෝදනා සම්බන්ධයෙන් නීතිපතිවරයා විසින් සක්විති රණසිංහ ඇතුළු පිරිසකට එරෙහිව කොළඹ මහාධිකරණයේ නඩු තුනක් ගොනු කර තිබුණි.

එම නඩු සම්බන්ධයෙන් රුපියල් ලක්ෂ 5 බැගින් වූ මුදල් ඇප සහ රුපියල් ලක්ෂ 25ක් බැගින් වූ ශරීර ඇප දෙකක් මත විත්තිකරු මුදාහැරීමට කොළඹ මහාධිකරණ විනිසුරු ශෂී මහේන්ද්‍රන් මහතා අද නියම කළේය.

ඔහුට එරෙහිව පවතින තවත් නඩුවක් සඳහා රුපියල් ලක්ෂයක මුදල් ඇප සහ රුපියල් ලක්ෂ 25ක් බැගින් වූ ශරීර ඇප දෙකක් මත මුදා හැරීමටද කොළඹ මහාධිකරණ විනිසුරු ධම්මික ගනේපොල මහතා විසින් නියම කරනු ලැබිණ.