තමන් කෘෂිකර්ම අමාත්‍යවරයා සමයේ ද ගොවින් වගාබිම් රැකගැනීමට ගිනි අවි ඉල්ලා සිටි නමුත් තමන් ඒ පියවර පිළිනොගත් බව අමරවීර මහතා සඳහන් කළේය.
වනසතුන්ගෙන් වගාවන්ට වන හානි වැළැක්වීමට නම් ගිනි අවි ලබාදීම වෙනුවට ගත හැකි පියවර පිළිබඳව විද්‍යාත්මක හා සම්ප්‍රදායික යන අංශ දෙකෙන්ම නිසි අධ්‍යයනයක් සිදුකළ යුතු යැයි පරිසර අමාත්‍යවරයා කීය.
රජය ගෙන ඇති මෙම තීරණය පිළිබඳව අමාත්‍යවරයාගේ මතය කුමක්දැයි පරිසර අමාත්‍යංශයේ පැවැති මාධ්‍ය හමුවක දී මාධ්‍යවේදීන් විමසූ අවස්ථාවේ අමරවීර මහතා මේ බව කියා සිටියේය.
ඇතැම් සතුන්ගේ ගහණය ඉහළයාමට හේතුව විලෝපිතයින් වඳවී යාම, කැළෑ එළි පෙහෙළි කිරීම, මිනිස්සු සතුන්ට ජීවත්වීමට තිබෙන ඉඩම් අල්ලා ගැනීම හා කැළෑ විනාශ කිරීම යැයි කී අමාත්‍යවරයා මේ නිසා අදාළ ආයතනවල නිලධාරින් විසින් නව තාක්ෂණික ක්‍රම අත්හදා බැලිම කළයුතු බවත් එවිට සතුන් ගෙන් සිදුවන වගා හානි අවම කර ගත හැකි වන අතර මිනිසාත්, සතුනුත් මෙම පරිසරය තුළ ජීවත් කළ හැකි සමතුලිත වැඩ පිළීවෙළක් ක්‍රියාත්මක කළ හැකිවනු ඇති බවත් කියා සිටියේය.
මෙරට වගාවන්ගෙන් සියයට හතලික පමණ අස්වැන්නක් වනසතුන් විසින් විනාශ කරන්නේ යැයි ද රිළවා, වඳුරා, මොනරා, වල් ඌරා, දඬුලේනා හා ඉත්තෑවා මේ අතර ප්‍රධාන වන්නේ යැයි ද කී අමරවීර මහතා මරාදමනවාට වඩා ඔවුන්ගේ බෝවීම අඩුකළ හැකි ක්‍රම හා ඔවුන් පළවා හැරීමට යොදා ගත හැකි විදුලි උපාංග වැනි නව තාක්ෂණික ක්‍රම ද ඇති බවත් ආයුධ ලබා දුන් පමණින් අහිංසක සතුන් මරා දැමීමට ඉඩ නොදෙන බවත් ඔහු තව දුරටත් කියා සිටියේය.
