වතු කම්කරුවන්ගේ දෛනික දීමනාව රුපියල් 1,500/= ක් දක්වා වැඩි කිරීමට කටයුතු කර ඔවුන්ගේ ජන ජිවිතය උසස් මට්ටමකට ගෙන ඒමට පියවර ගන්නා බවත් සජිත් ප්‍රේමදාස මහතා ප්‍රකාශ කළේය. සජිත් ප්‍රේමදාස මහතා මෙම අදහස් පළ කළේ අවිස්සාවේල්ල, පුවක්පිටිය, ප්‍රගතිපුර ක්‍රීඩාංගනයේ පැවති වතු කම්කරු ප්‍රජාවගේ හමුවකට අද (31) එක්වෙමිණි. දෙමළ ප්‍රගතිශිලි සංධානය විසින් මෙම වතු කම්කරු ප්‍රජාවගේ හමුව සංවිධානය කරන ලද අතර මේ සඳහා මනෝ ගනේෂන් සහ වී. රාධ ක්‍රිෂ්ණන් යන ඇමතිවරුන් ද සහභාගි වූහ.
මෙහිදී වැඩිදුරටත් අදහස් දැක්වූ සජිත් ප්‍රේමදාස මහතා මෙසේ ද පැවසීය. “මෙරට වතු කම්කරු ප්‍රජාව රටට විශාල ශක්තියක්. වතු කම්කරු ජනතාව නිසා රටට විශාල විදේශ විනිමයක් ලැබෙනවා. නමුත් වතු කම්කරු ප්‍රජාව ගත කරන්නේ ඉතාම දුෂ්කර ජිවිතයක්. ඔවුන්ගේ ජන ජිවිතය උසස් මට්ටමකට ගෙන ඒමට තමන් අනාවාර්යයෙන්ම කටයුතු කරනවා. එදා දිවංගත මගේ පියාණන් ලක්‍ෂ 12කටආසන්න වූ මෙරට වතු ප්‍රජාව වෙත පුරවැසිභාවය ලබා දී ඔබේ පුරවැසි අයිතිය රැක ගන්නට කටයුතු කළා. මාගේ පියාණන් ඔබට පුරවැසිභාවය ලබා දුන්නාසේම, යටිතල පහසුකම්වලින් සම්පුර්ණ වූ සංවර්ධිත, ශක්තිමත් ජන ජිවිතයක් සජිත් ප්‍රේමදාස ඔබ සියලු දෙනාට ලබා දෙන්නට කටයුතු කරනවා“ යනුවෙන් ද පැවසීය.
