ඔහු අවධාරණය කළේ ලංකාව තුළ ගුවන් තොටුපොළ හතරක් ජාත්‍යන්තර ගුවන්තොටුපොළ ලෙස ප්‍ර‍වර්ධනය කෙරෙන බවයි. ඒ කටුනායක, මත්තල, රත්මලාන සහ මඩකලපුව වේ. එම ගුවන්තොටුපොළ එකිනෙකට සම්බන්ධ කෙරෙමින් කලාපීය සහ ජාත්‍යන්තර ගුවන් ගමන් සේවා ආරම්භ කෙරෙන බවද අමාත්‍ය අර්ජුන රණතුංග මහතා පැවසීය.
එතුමා මේ බව කියා සිටියේ අද (05) පලාලි ගුවන්තොටුපොළේ නිරීක්ෂණ චාරිකාවකට එක් වෙමිනි. එම චාරිකාවෙන් පසුව යාපනය දිස්ත්‍රික් ලේකම් කාර්යාලයේදී පලාලි ගුවන්තොටුපොළේ ඉදිරිකිරීම් කටයුතු පිළිබද ප්‍ර‍ගති සමාලෝචන රැස්වීමක්ද පැවැත්විණ. එම නිරීක්ෂණ චාරිකාව අතරතුරදී මාධ්‍යවේදීන් නැගූ ප්‍ර‍ශ්නවලට පිළිතුරු දෙමින් අමාත්‍ය අර්ජුන රණතුංග මහතා වැඩිදුරටත් පැවසුවේ ඔක්තෝම්බර් මාසයේ 10ත් 15ත් අතර කාලයේදී පලාලි ගුවන්තොටුපොළේ මෙහෙයුම් ආරම්භ කරන බවයි.
