අලුතින් ගුවන් ගමන් ඇරඹීමට ජාත්‍යන්තර ගුවන් සේවා කිහිපයක් සාකච්ඡා අරඹයි

ජූලි 21, 2021

    දැනට ලෝකය පුරා විහිදී තිබෙන ගුවන් සමාගම් 32ක් ශ්‍රී ලංකාව සමඟ ගුවන් ගමන් සේවාවල නිරත වන අතර නව ගුවන් සේවා 4ක් අලුතින් ගුවන් ගමන් ආරම්භ කිරීම පිළිබඳව සාකච්ඡා ආරම්භ කර ඇතැයි, සංචාරක අමාත්‍ය ප්‍රසන්න රණතුංග මහතා සඳහන් කරයි.

    එයා ෆ්‍රාන්ස් ගුවන් සමාගම සහ මැද පෙරදිග ගුවන් සමාගමක් ශ්‍රී ලංකාව සමඟ කඩිනමින් ගුවන් ගමන් සේවා ආරම්භ කිරීම සඳහා එකඟත්වය පළකර ඇති අතර කටුනායක බණ්ඩාරනායක ගුවන් තොටුපළ මෙන්ම මත්තල ජාත්‍යන්තර ගුවන්තොටුපළ ද ආවරණය වන පරිදි ගුවන් ගමන් ගමන් වාර ආරම්භ කිරීමට කැමැත්ත පළ කොට තිබේ.

    මේ අතර ඕමාන් ගුවන් සේවයට අයත් සලාම් ගුවන් සේවය මත්තල ජාත්‍යන්තර ගුවන් ගුවන්තොටුපළ සමග ගුවන් ගමන් වාර ආරම්භ කිරීම කෙරෙහි සාකච්ඡා පවත්වා ඇත. මීට අමතරව සිනමන් ගුවන් සේවය ලංකාව පුරා විහිදී තිබෙන අභ්‍යන්තර ගුවන් ගුවන්තොටුපල ආවරණය වන පරිදි ගුවන් ගමන් ගමන්වාර ආරම්භ කිරීමට කැමැත්ත ප්‍රකාශ කර ඇත.

    නව වැඩපිළිවෙළ යටතේ ශ්‍රී ලංකාව ගුවන් ගමන් ක්ෂේත්‍රයේ කේන්ද්‍රස්ථානයක් බවට නංවාලීම තුළින් ධනාත්මක තරගකාරිත්වයක් ඇතිකර ශ්‍රී ලංකාවේ ගුවන්තොටුපළ වල මගී ධාරිතාවය ඉහළ නැංවීමට පියවර ගැනෙයි.

    දිවයිනේ සංචාරක ව්‍යාපාරය යථාවත් කිරීම සඳහා ලෝකය පුරා ගෙන යන සංචාරක ප්‍රචාරණ ප්‍රවර්ධන වැඩසටහනට සමගාමීව ගුවන් ගමන් වාර ප්‍රමාණයද ඉහළ නැංවීමට අපේක්ෂිතය.

    ලෝකය පුරා රටවල් සමඟ ගුවන් ගමන් සේවා ව්‍යාප්ත කිරිමත් සමගම දිවයිනට ඉදිරි කාලය තුළ ඇදී එන සංචාරකයින් ප්‍රමාණය දිනකට දහස ඉක්මවනු ඇති බවට ද අමාත්‍ය ප්‍රසන්න රණතුංග මහතා විශ්වාසය පළ කරයි.

    Latest News