icc

බැසිල්ට පැන වූ විදෙස් ගමන් තහනම ඉවතට

දෙසැ 02, 2020

    හිටපු අමාත්‍ය බැසිල් රාජපක්ෂ මහතාට පනවා තිබු විදෙස් ගමන් තහනම ගම්පහ අංක 01 මහාධිකරණ විනිසුරු නිමල් රණවීර මහතා අද ඉවත් කර තිබේ.

    ඔහුට මෙම විදෙස් ගමන් තහනම පනවා තිබුණේ, දොම්පේ මල්වාන ප්‍රදේශයෙන් ඉඩමක් මිලට ගෙන එහි සුවිසල් නිවසක් සහ නාන තටාකයක් ඉදිකර රජයේ මුදල් අවභාවිත කිරිමේ චෝදනා සම්බන්ධයෙන් විභාග වන නඩුවකට අදාළවයි.

    එහි වගඋත්තරකරුවන් ලෙස නම් කරමින් හිටපු අමාත්‍ය බැසිල් රාජපක්ෂ මහතා සහ තිරුකුමාර් නඩේෂන් යන මහත්වරුන්ට එරෙහිව නීතිපතිවරයා මෙම නඩුව පවරා තිබුණි.

    ජනාධිපතිවරයා විසින් ආර්ථික පුනර්ජීවනය හා දරිද්‍රතාවය තුරන් කිරීම සඳහා වන ජනාධිපති කාර්ය සාධක බලකායේ සභාපති ලෙස හිටපු අමාත්‍ය බැසිල් රාජපක්ෂ මහතා පත්කර ඇති බවත් එහි රාජකාරිකාරිමය කටයුතු සඳහා තම සේවාදායකයාට විදේශ ගතවීමට සිදු වන හෙයින් ඒ සඳහා ඇති තහනම ඉවත් කරන ලෙස ජනාධිපති නීතිඥ ඩී.ඒ.පී.වීරත්න මහතා මෝසමක් ඉදිරිපත් කරමින් අද ගම්පහ මහාධිකරණයෙන් ඉල්ලා සිටියේ ය.

    ඒ, හිටපු අමාත්‍ය බැසිල් රාජපක්ෂ මහතාව එම තනතුරට පත් කිරීමට අදාළ ගැසට් නිවේදනයේ පිටපතක් ද මහාධිකරණයට ඉදිරිපත් කරමිනි.

    ඒ අනුව ලබන මාර්තු මස 12 වැනි දා ගම්පහ මහාධිකරණය හමුවේ පෙනී සිටිමේ කොන්දේසි මත හිටපු අමාත්‍ය බැසිල් රාජපක්ෂ මහතාගේ විදෙස් ගතවීමේ තහනම ඉවත් කරන බව නියෝග කළ ගම්පහ මහාධිකරණ විනිසුරු නිමල් රණවීර මහතා ඒ බව ආගමන විගමන පාලක වෙත දැනුම් දෙන ලෙස ද නියෝග කළේය.

    Latest News